Við óskum eftir að ráða til starfa öfluga liðsmanneskju í okkar góða hóp á barna- og unglingageðdeild. Starfið felst í umsjón með umhverfi legudeildar s.s. undirbúningi og frágangi matmálstíma, línherbergi, þvottahúsi, geymslurýmum, starfsmannaaðstöðu og almennum rýmum og skipulagi á nauðsynlegu viðhaldi. Að auki felst hluti starfsins í því að vera í teymi heilbrigðisritara og sinna störfum í móttöku göngudeildar. Starfið byggir á samvinnu þar sem mikilvægt er að sérhver starfsmaður fái að nýta styrkleika sína.

Leitað er eftir þjónustulundaðri, lausnamiðaðri og jákvæðri manneskju sem er sjálfstæð og skipulögð í starfi. Viðkomandi er virkur þátttakandi í starfsemi deildanna og þarf að geta sýnt sveigjanleika í líflegu starfsumhverfi. Gert er ráð fyrir að viðkomandi sæki námskeið í grunnendurlífgun og sé vel að sér varðandi sóttvarnir og smitgát.

Starfshlutfall er 60%, fyrri hluta dags alla virka daga. Upphafsdagur er samkomulagsatriði.

Barna- og unglingageðdeild samanstendur af þremur deildum á Landspítala; legudeild, dagdeild og göngudeild. Þar er veitt sérhæfð og fjölskyldumiðuð heilbrigðisþjónusta við börn sem þarfnast sjúkrahúsþjónustu vegna geðræns vanda. Á deildunum starfa samtals um 100 einstaklingar í fjölskylduvænu starfsumhverfi. Þjónustan er í stöðugri framþróun og kapp er lagt á notendamiðaða þjónustu og styttingu biðtíma.